Kagawa ataka kutimka Old Trafford Januari

MANCHESTER, England

KIUNGO wa Manchester United, Shinji Kagawa (24) anataka kuondoka Old Trafford wakati wa usajili wa Januari kutokana na hofu kwamba benchi linaweza kumnyima nafasi ya kucheza Kombe la Dunia mwakani nchini Brazil akiwa na timu yake ya taifa ya Japan. David Moyes amekuwa akimsugulisha benchi Kagawa na klabu ya Wolfsburg ya Ujerumani imetangaza nia yake ya kutaka kumnasa Mjapan huyo.

Arsenal yamnyemelea Gundogan

LONDON, England

ARSENAL wamepania kuongeza Wajerumani kwenye kikosi chao na sasa wameanza kumnyemelea kiungo wa Borussia Dortmund, Ilkay Gundogan (23), ambaye pia anawaniwa na miamba ya Barcelona kwenda kuziba nafasi ya Xavi Hernandez. Thamani ya Mjerumani huyo ni pauni milioni 25 (sh bilioni 62.527) na Arsene Wenger anataka Gundogan aungane na Wajerumani wengine Emirates kama kina Mesut Ozil, Per Mertesacker, Lukas Podolski na Serge Gnabry.